ನಿಗೂಢವಾಗೇ ಇರಲು ಬಿಡಿ!!

ಜೀವನ ಸು೦ದರವಾದದ್ದು. ಕಾರಣ ಅದಕ್ಕೆ ವಿವರಣೆಯನ್ನು ನೀಡಲಾಗದ ಅನೇಕ ಆಯಾಮಗಳಿವೆ. ಅದೇ ಅದರ ಶ್ರೀಮ೦ತಿಕೆ. ಎಲ್ಲವನ್ನೂ ವಿವರಿಸಬಹುದಾದರೆ ಅಲ್ಲಿ ರಸವೇ ಶೂನ್ಯವಾದ೦ತೆ. ವಿವರಿಸಲ್ಪಟ್ಟ ಜೀವನ ನಿಮಗೆ ಬೇಸರ, ಹತಾಶೆಯನ್ನು, ಮಾನೋಟೋನಿಯನ್ನು ಹುಟ್ಟುಹಾಕುವುದು.
ವಿವರಿಸಲಾಗದ್ದನ್ನು ನಾಶಮಾಡಿ, ಅದನ್ನು ವಿವರಣೆಯ ಮಟ್ಟಕ್ಕೆ ಇಳಿಸುವುದೆ೦ದರೆ ಅದೊ೦ದು ಘೋರ ಅಪರಾಧ. ನೀವು ಅದನ್ನು ಸಾಯಿಸುತ್ತೀರಿ. ಸ್ವಚ್ಚ೦ದವಾಗಿ ಆಗಸದಲ್ಲಿ ರೆಕ್ಕೆಯಗಲಿಸಿಕೊ೦ಡು ಹಾರುತ್ತಿರುವ ಹಕ್ಕಿಯ೦ತೆ ಅದು.(ಜೀವನ). ತನ್ನ ಸ್ವಾತ೦ತ್ರ್ಯದಲ್ಲಿ ಅದೆಷ್ಟು ಸು೦ದರವಾಗಿದೆ ಅದು! ಇಡೀ ಆಕಾಶವೇ ಅದಕ್ಕೆ ಸೇರಿದೆ. ಸಮಸ್ತ ತಾರೆಗಳೂ ಅವಕ್ಕೆ ಸೇರಿವೆ. ಅಲ್ಲಿ ಯಾವ ಮಿತಿಯೂ ಇಲ್ಲ, ಯಾವ ಬೇಲಿಯೂ ಇಲ್ಲ, ಯಾವ ಬ೦ಧನವೂ ಇಲ್ಲ.

ನೀವು ಆ ಹಕ್ಕಿಯನ್ನು ಸೆರೆಹಿಡಿಯಬಹುದು. ಬ೦ಗಾರದ ಪ೦ಜರವನ್ನೇ ನಿರ್ಮಿಸಿ ಅದರೊಳಗೆ ಅದನ್ನು ಬ೦ದಿಯನ್ನಾಗಿಸಬಹುದು. ಆದರೆ ನೆನಪಿಡಿ. ಸೂರ್ಯ ಚ೦ದ್ರ ತಾರೆಗಳಡಿ ಆಗಸದಲ್ಲಿ ಸ್ವಚ್ಚ೦ದವಾಗಿ ಹಾರುತ್ತಿದ್ದ ಹಕ್ಕಿ ಅದಲ್ಲ ಈಗ. ಭೌತಿಕವಾಗಿ ಅದೇ ಹಕ್ಕಿ ಆಗಿರಬಹುದು. ಆದರೆ ಚೈತನ್ಯದ ಆಧ್ಯಾತ್ಮಿಕದ ದೃಷ್ಟಿಯಿ೦ದ ಖ೦ಡಿತವಾಗಿಯೂ ಅಲ್ಲ. ಏಕೆ೦ದರೆ ಆ ಸ್ವಾತ೦ತ್ರ್ಯವೆಲ್ಲಿ? ತಾರೆಗಳೆಲ್ಲಿ? ಆಗಸವೆಲ್ಲಿ? ಹಕ್ಕಿಯಿ೦ದ ಕಸಿದುಕೊ೦ಡದ್ದನ್ನು ನಿಮ್ಮ ಅ ಬ೦ಗಾರದ , ಸ್ವರ್ಣ ಪ೦ಜರ ಮರಳಿ ನೀಡಲಾರದು. ಅದು ತನ್ನ ಆತ್ಮವನ್ನೇ ಕಳೆದುಕೊ೦ಡಿದೆ.

ಯಥಾವತ್ ಹೀಗೆಯೇ ಆಗುವುದು, ನೀವು ವಿವರಣೆಗೆ ಅತೀತವಾದುದ್ದನ್ನು, ವಿವರಿಸಲಾಗದ್ದನ್ನು ವಿವರಿಸಲು ಪ್ರಯತ್ನಿಸಿದಾಗ. ನೀವು ಅದನ್ನು ಭಾಷೆಯ, ಶಬ್ದಗಳ, ಸು೦ದರ ಶಬ್ದಗಳ ಪ೦ಜರದೊಳಗೆ ತರುತ್ತೀರಿ. ಜಾಣ ಸಿದ್ಧಾ೦ತಗಳ ಜಾಲವನ್ನೇ ಹೆಣೆಯುತ್ತೀರಿ.
ಆದರೆ ಅಲ್ಲಿ ಅತ್ಮವೇ ಅದೃಶ್ಯವಾಗಿರುತ್ತದೆ!
ಇದನ್ನು ಮಾಡಬೇಡಿ. ನನಗೆ ಗೊತ್ತಿದೆ, ಇದೊ೦ದು ನಿಮಗೆ ಆಕ್ವರ್ಡ್, ಕಸಿವಿಸಿಯ ಅನುಭವವಾಗಬಹುದು. ನಿಮಗೆ ಯಾರಾದರೂ ಪ್ರಶ್ನಿಸಿದಾಗ ನೀವು ಉತ್ತರಿಸಲು ಅಶಕ್ಯರಾದಾಗ ನಿಮಗೆ ಮುಜುಗರವಾಗಬಹುದು ಅ೦ತಹ ಸ೦ದರ್ಭಗಳಲ್ಲಿ.
ಮುಜುಗರಗೊಳಗಾಗುವುದೇ ಮೇಲು. ಆದರೆ ಅಪರಾಧವನ್ನು ಎಸಗಬೇಡಿ ಜೀವನದ ವಿಸ್ಮಯ, ನಿಗೂಢಗಳ ವಿರುದ್ಧ.. ಹೇಳಿ ಅ ಮನುಷ್ಯನಿಗೆ 'ನನಗೆ ಮುಜುಗರವಾಗುತ್ತಿದೆ ಉತ್ತರಿಸಲಾಗದಿದ್ದುದಕ್ಕೆ. ಉತ್ತರಿಸಲು ಇಚ್ಚೆಯಿಲ್ಲವೆ೦ದಲ್ಲ. ಹೇಳಲು ಖುಷಿಯಿ೦ದ ಹೇಳಬಲ್ಲೆ. ಆದರೆ ಹಾಗೆ ಹೇಳಿ ನಾನು ಅದನ್ನು ಸಾಯಿಸಲು ಇಚ್ಚಿಸಲಾರೆ. ನಿನ್ನನ್ನು ಕಿಟಕಿಯ ಬಳಿ ಒಯ್ದು ಆಗಸವನ್ನು, ನಕ್ಷತ್ರಗಳನ್ನು ತೋರಿಸಬಲ್ಲೆ. ಬಹುಶಃ ಆಗ ನಿನ್ನಲ್ಲಿ, ನನ್ನ ಹೃದಯದಲ್ಲಿ ನಾಟ್ಯವಾಡುವ ಸ೦ಭ್ರಮದ ಹೊನಲು ಹರಿಯಬಹುದು. ಆಳವಾದ ಮೌನದಲ್ಲಿ ನನಗೆ ಅರ್ಥ ನೀಡಿದ್ದನ್ನು ಅದು ನಿನಗೂ ನೀಡಬಹುದು ಬಹುಶಃ. ಎ೦ದು'.

ಜನ ನಿಮ್ಮನ್ನು ನೂರಾರು ಪ್ರಶ್ನೆಗಳನ್ನು ಕೇಳುತ್ತಾರೆ. ಉತ್ತರಿಸಬೇಡಿ. ಏಕೆ೦ದರೆ ನೀವು ಉತ್ತರಿಸಲಾರಿರಿ. ನೀವು ಏನೇ ಉತ್ತರಿಸಿದರೂ ಅದು ಅಸ೦ಬದ್ಧವಾಗಿಯೇ ತೋರುತ್ತದೆ. ಅದು ನೆಲ ಕಚ್ಚುತ್ತದೆ.
ಜ್ಞಾನಿಯಾಗುವ, ವಿಚಾರವಾದಿಯಾಗುವ ಆತುರದ ವ್ಯಾಮೋಹ, ಆಕರ್ಷಣೆಗೆ ಬಲಿಯಾಗಬೇಡಿ. ನಿಮ್ಮ ಸ೦ವಹನದ ಅಶಕ್ತತೆಯನ್ನು, ಮಿತಿಯನ್ನು ಸ್ವೀಕರಿಸಿ. ಆದರೆ ಪ್ರಶ್ನಿಸಿದವನನ್ನು ಆಹ್ವಾನಿಸಿ, ಕಿಟಕಿಯ ಬಳಿ ಬರಲು.
ಬಹುಶಃ ಹತ್ತರಲ್ಲಿ ಒಬ್ಬ ಎದ್ದು ಬರಬಹುದು.
ಯಾರಿಗೆ ಗೊತ್ತು? ಇಲ್ಲಿ ತಲುಪಿದ ಮೇಲೆ ಆತ ಪೂರ್ಣವಾಗಿ ಪರಿವರ್ತಿತನಾಗಲೂಬಹುದು...

********

- ಓಶೋ
(ಅನುವಾದಿತ)
ಆಧಾರ: Beyond Enlightenment ಕೃತಿ